ab soch meray dost Khuda hei kay nahin hei

yeh aag, yeh pani, yeh hawaa hei kay nahin hei?
yeh barq, yeh baaraan, yeh ghataa hei kay nahin hei?
yeh phool, yeh kalyaan, yeh saba hei kay nahin hei?
har rang mein Wo jalwa-numa hei kay nahin hei?

ab soch meray dost Khuda hei kay nahin hei ???

yeh chand, yeh sooraj, yeh sitaray hein safar mein
yeh behr, yeh amwaaj, yeh dharay hein safar mein
fitrat kay dil-aawaiz nazaray hein safar mein
inka bhi koi raah-numa hei kay nahin hei?

ab soch meray dost Khuda hei kay nahin hei ???

yeh daanay kay seenay pay shajar rakh diya kiss nein?
yeh sang kay pahloo mein sharar rakh diya kiss nein?
yeh qatra-e-naisaan mein gohar rakh diya kiss nein?
yeh mojza-e-Rabb-ul-ulaa hei kay nahin hei

ab soch meray dost Khuda hei kay nahin hei ???

phailay huay har samt kamaalaat hein kiss kay?
yeh loh-o-qalam, arz-o-samaawaat hein kiss kay?
taa-hadd-e-nazar masbat nishaanaat hein kiss kay?
ehsaas tujhay iss ka zara hei kay nahin hei?

ab soch meray dost Khuda hei kay nahin hei ???

kiss zaat ka lahron ki zabaan par hei wazeefa?
kiss zaat ki haibat ka samunder hei saheefa?
kiss zaat nein insaan ko banaya hei khaleefa?
aye kor-nazar deeda waa hei kay nahin hei?

ab soch meray dost Khuda hei kay nahin hei ???
ab soch meray dost Khuda hei kay nahin hei ???

Read more poems